Një dit pas samitit të tretë brenda vitit mes dy Koreve, Shtetet e Bashkuara të Amerikës kanë shprehur gatishmërinë për rifillimin e negociatave me Phenianin me qëllim denuklearizimin e vendit komunist deri në vitin 2021.
Sekretari amerikan i Shtetit Mike Pompeo tha se kjo ishte baza E krijimit të marrëdhënieve të rëndësishme me SHBA, ndërsa shtoi se ka ftuar Ministrin e Jashtëm të Koresë së Veriut, Ri Yong-ho që të takohej me të në New York javën e ardhshme.
“Kjo do të shënojë fillimin e negociatave për të transformuar marrëdhëniet SHBA-Kore e Veriut përmes procesit të denuklearizimit të vendit komunist, që do të përfundojë deri në janar 2021, ku kryetari Kim do ndërtojë një regjim të qëndrueshëm dhe paqe në Gadishullin Korean”.
Bisedimet mes Washingtonit dhe Phenianit kanë ngecur pas takimit historik të presidentit amerikan Donald Trump dhe liderit komunist Kim Jong Un në Singapor në qershor të këtij viti.
Kjo për shkak se pavarësisht premtimit të Kim jong Un, inteligjenca amerikane pasqyroi foto që provonin se Koreja e Veriut po vijonte zhvillimin e programit bërthamor.
Nga ana tjetër Uashingtoni njoftoi se do të vendoste sanksione ndaj Koresë së Veriut, duke i ngrirë marrëdhëniet mes dy vendeve.
