SHBA e kanë bërë të qartë se zgjedhjet parlamentare në Shqipëri duhet të mbahen në 18 qershor. Zv/ndihmës Sekretari Amerikan i Shtetit për Çështjet Europiane dhe Euroaziatike, Hoyt Brian Yee, deklaroi se opozita dhe të gjitha partitë duhet të bëhen pjesë e procesit zgjedhor dhe të mos e bllokojnë atë.
“Shqipëria do të duhej së paku, të mbajë zgjedhjet e saj në kohën e duhur, në 18 qershor besoj. Atje ne e nxisim opozitën dhe të gjitha partitë që të marrin të gjithë pjesë në zgjedhje, jo që t’i bllokojnë zgjedhjet. Dhe nëse ka probleme ne besojmë se opozita dhe qeveria duhet të dialogojne që t‘i zgjidhin ato, në mënyrë që zgjedhjet të jenë të lira dhe të ndershme”.
Këtë koment, zyrtari i lartë i Departamentit të Shtetit e bëri gjatë një interviste për RTK-në. Më herët SHBA janë shprehur kundër bojkotit të parlamentit nga opozita dhe kanë kërkuar dialog mes palëve. Të njëjtin qëndrim mban edhe BE, që ka kërkuar t’i jepet fund bojkotit dhe opozita të hyjë në zgjedhje.
