SHBA gati për testimin masiv të popullatës/ Trump: Nuk do të jetë aspak problem

Shtetet e Bashkuara të Amerikës kanë një plan që të testojnë masivisht popullatën me qëllim që hapja të jetë më e sigurtë dhe të ringrihet ekonomia.

Gjatë një konference për mediat nga Shtëpia e Bardhë, presidenti Donald Trump deklaroi se është gati të ndjekë këtë plan.

“Të gjitha pjesët e vendit janë në gjendje të mirë, ose duke u përmirësuar. Në të gjitha rastet duke u përmirësuar. Testimi nuk do të jetë aspak problem. Ka një dëshirë të madhe për rihapjen e vendit tonë. Disa prej jush duhet të mendoni rreth hapjes së shkollave sepse shumë njerëz duan hapjen e shkollave.”

Nga ana tjetër, ai nuk la pa “thumbuar” edhe një herë Kinën për gjithë këtë histori. Trump nuk u shpreh i kënaqur me menaxhimin që Kina i bëri situatës, pasi sipas tij, ajo duhet ta kishte ndaluar virusin në burim.

“Askush përveç një vendi nuk mund të jetë përgjegjës për atë që ndodhi.”