Shtetet e Bashkuara dhe Mbretëria e Bashkuar kanë vendosur sanksione shtesë ndaj zyrtarëve të Hamasit, tha të mërkurën Departamenti Amerikan i Thesarit.
Sanksionet synojnë tetë individë që përfaqësojnë interesat e grupit jashtë vendit dhe menaxhojnë financat e tij, tha Thesari, cituar nga agjencia e lajmeve Reuters.
“Shtetet e Bashkuara do të vazhdojnë të punojnë me partnerët tanë, duke përfshirë Britaninë e Madhe, për t’i mohuar Hamasit aftësinë për të mbledhur dhe përdorur fonde për të kryer mizoritë e tij,” tha në një deklaratë Sekretarja e Thesarit Janet Yellen.
Departamenti ka zbuluar edhe emrat dhe lidhjet e ndryshme që çdo zyrtar i Hamasit thuhet se ka.
-Haroun Mansour Yaqoub Nasser Al-Din i cili është kreu i zyrës së Hamasit në Jerusalem dhe ka qenë një nga operativët kryesorë financiarë të Hamasit në Turqi
-Ali Abed Al Rahman Baraka është një drejtues në Liban i Marrëdhënieve Kombëtare të Hamasit me Jashtë.
-Maher Rebhi Obeid i cili është një udhëheqës i lartë politik i Hamasit me bazë në Liban dhe ka qenë pjesë e Byrosë Politike të Hamasit që nga viti 2010.
-Hassan Al-Wardian i cili është një zyrtar i lartë i Hamasit dhe një figurë kyçe në Betlehem që përfaqëson Hamasin.
Zyrtarët e Departamentit të Thesarit të SHBA thonë se “të gjitha pronat dhe interesat në pronë” që janë në SHBA do të bllokohen dhe duhet të raportohen në Zyrën e Kontrollit të Pasurive të Huaja.
Çdo subjekt që zotërohet, drejtpërdrejt ose tërthorazi, me 50% ose më shumë do të ngrihet gjithashtu, përveç nëse jepet autorizim specifik nga departamenti amerikan.
Deklarata e Thesarit të SHBA shton: “Përveç kësaj, institucionet financiare jo-amerikane dhe personat e tjerë që angazhohen në transaksione ose aktivitete të caktuara me entitete dhe individë të sanksionuar mund të ekspozohen ndaj rrezikut të sanksioneve ose t’i nënshtrohen një veprimi detyrues”./vizionplus.tv
