Ambasada e Shteteve të Bashkuara të Amerikës dhe ajo e Mbretërisë së Bashkuar në Kosovë, kanë reaguar për emërimet e fundit të kryetarit të Gjykatës së Apelit dhe të Gjykatës Supreme, nga Këshilli Gjyqësor i Kosovës. Në njoftimin për media, ambasadat shprehen të zhgënjyera me vendimin që votimi të mbahet i fshehtë. Ata besojnë se votimi i hapur do të dërgojë sinjal të fortë të përkushtimit të këshillit gjyqësor të Kosovës ndaj parimeve të transparencës, meritokracisë dhe llogaridhënies. Por, përsëritja e procesit të rizgjedhjes së kryetarëve, ka vënë në dyshim përkushtimin e sinqertë ndaj këtyre parimeve. Nga ana tjetër, ambasadat kërkojnë përkushtimin e të gjithë anëtarëve të këshillit dhe një lidership të fuqishëm.
