Arrestimet e qindra protestuesve në demonstratat kundër korrupsionit në Rusi kanë sjellë reagimin e ashpër të Bashkimit Europian dhe SHBA.

 

Brukseli ka kërkuar lirimin e menjëhershëm të të ndaluarve, mes të cilëve ishte edhe udhëheqësi i opozitës, Alexei Navalny. Një zëdhënës i BE, theksoi se policia ka ndaluar ushtrimin e të drejtave themelore në Kushtetutë, si liria e shprehjes dhe e tubimeve paqësore.

 

Në të njëjtën linjë ishte edhe Departamenti Amerikan i Shtetit, që deklaroi se qytetarët kanë të drejta që duhet t’i ushtrojnë pa patur frikë se do të ndëshkohen. Zëdhënësi i DASH, Mark Toner tha se qytetarët rusë, ashtu si ata të çdo vendi, meritojnë një qeveri që mbështet një treg të hapur idesh, qeverisje transparente dhe trajtim të barabartë sipas ligjit. Por deri tani Kremlini ka reaguar vetëm duke sqaruar se protestat ishin provokime të paligjshme.

 

Në tubimet në të gjithë Rusinë u kërkua dorëheqja e kryeministrit Medvedev si përfitues i pasurive të paligjshme dhe u hodhën parulla kundër presidentit Putin, që demonstruesit e quajtën hajdut.

 

Navalny, kryetar i Partisë së Progresit doli përpara një gjykate këtë të hënë, ndërsa në Twitter shkroi: Do te vijë koha kur ata do të dalin në gjyq. 40-vjeçari mund te dënohet me 15 ditë burg si organizator i protestave të ndaluara.

 

 

Leave a Reply

Your email address will not be published. Required fields are marked *