Shtetet e Bashkuara të Amerikës akuzojnë Kinën për situatën e krijuar me pandeminë e koronavirusit. Sekretari i Shtetit, Antony Blinken tha se zyrtarët e Pekinit nuk kanë qenë transparent që në fazat e hershme të shfaqjes së virusit.

 

“Unë mendoj se Kina e di që në fazat e hershme të COVID-it, ajo nuk bëri atë që duhej të bënte, e cila do të ishte që në kohë reale t’u jepte qasje ekspertëve ndërkombëtarë të shkëmbente informacion, në kohe reale dhe të ishte me të vërtetë transparente.”

 

Numri i të infektuarve dhe viktimave nga Covid-19, sipas Blinken, ka treguar se duhet të forcohet sistemi global i shëndetësisë për të parandaluar që një situatë e tillë të përsëritet.

 

“Duhet të vendosim një sistem më të fortë global shëndetësor për t’u siguruar që kjo nuk do të ndodhë më, ose nëse do të ndodhë përsëri, të jemi në gjendje ta zbusim atë, t’i dalim përpara. Bota duhet të ndërmarrë një angazhim të vërtetë për transparencë, për shkëmbimin e informacionit, për qasje të ekspertëve. Kjo do të thotë forcim i Organizatës Botërore të Shëndetësisë dhe reformim i saj në mënyrë që të mund ta bëjë një gjë të tillë. Dhe Kina duhet të luajë rol në këtë drejtim.”

 

Sekretari amerikan theksoi se do të duhet të bëhet një hetim i mëtejshëm mbi origjinën e koronavirusit në Wuhan të Kinës në mënyrë që të zbulohet plotësisht se si është shpërndarë virusi.

 

Në muajin shkurt, një grup ekspertësh nga Organizata Botërore e Shëndetësisë vizituan qytetin kinez për të hetuar origjinën e sars covid 2, por nuk arritën në një konkluzion përfundimtar pasi sipas tyre nuk kishin akses të plotë tek të dhënat.

 

 

Leave a Reply

Your email address will not be published. Required fields are marked *