Rritja e masave të sigurisë në veri të Kosovës ka vënë në alarm Beogradin. Pas drejtorit të zyrës për Kosovën, Petar Petkoviç, edhe kryeministrja e Serbisë, Ana Brnabiç deklaroi se po shqyrtohet mundësia e dërgimit të trupave në Kosovë sipas kushteve të rezolutës 12-44 të Kombeve të Bashkuara.

 

ANA BRNABIÇ

KRYEMINISTRJA E SERBISË

 

Jemi shumë afër dhe besoj se sot presidenti Aleksandar Vuçiç do të japë më shumë informacion rreth takimeve të tij, për të kërkuar kthimin e forcave tona në Kosovë sipas Rezolutës 1244 të OKB-së. Sepse KFOR-i nuk po e kryen punën e vet dhe sepse serbët në Kosovë nuk mund të ndihen të sigurt, aty rrezikohet jeta e tyre.

 

Sipas Brnabiç, Serbia do vetëm paqe, ndërsa Albin Kurti është ai që kërkon destabilizim.

 

I menjëhershëm ishte reagimi i Prishtinës zyrtare. Presidentja e Kosovës, Vjosa Osmani me anë të një statusi në rrjetet sociale tha se ka ikur koha e policëve dhe ushtarëve serb në Kosovë.

 

VJOSA OSMANI

PRESIDENTJA E KOSOVËS

 

Kërcënimi i hapur për agresion policor e ushtarak nga ana e Serbisë dëshmon se në atë shtet vazhdon mendësia hegjemoniste. Kjo duhet të refuzohet e kundërshtohet qartë nga e gjithë bota demokratike, e cila i dha goditjen më të fuqishme kësaj mendësie pikërisht në vitin 1999. Në territorin e Republikës së Kosovës kurrë më nuk do të ketë policë dhe ushtarë të Serbisë! Ëndrra hegjemoniste e Serbisë nuk do të jetësohet kurrë!

 

Osmani ka dënuar edhe sulmin ndaj policisë dhe gazetarëve në Veri.

 

VJOSA OSMANI

PRESIDENTJA E KOSOVËS

 

Plagosja e mbrëmshme e një pjesëtari të Policisë së Kosovës është veprim kriminal dhe i orientuar kundër rendit kushtetues e sovranitetit të Kosovës si dhe kundër veprimeve për sundim të rendit e ligjit. Gjithashtu, sulmet ndaj gazetarëve përbëjnë cenim flagrant të të drejtës për informim të lirë.

 

Nëse Serbia vendos të dërgojë trupat e saj të sigurisë në Kosovë, situata në veri mund të precipitojë në zhvillime të paparashikueshme, për shkak të përplasjeve të pritshme.

Leave a Reply

Your email address will not be published. Required fields are marked *