Serbia vijon të trazojë politikën në Ballkan dhe të ngrejë shqetësime për sigurinë me modernizimin e ushtrisë. Vetëm pak javë pas blerjes së një sistemi raketor francez, mbërriti edhe kontigjenti i parë i ndihmave ushtarake nga Moska me tanke dhe mjete të blinduara të cilat Rumania nuk i lejoi javën e kaluar të kalonin tranzit në territorin e saj për shkak të sanksioneve të BE-së ndaj Moskës.
Presidenti serb Aleksander Vuçiç falenderoi homologun rus Vladimir Putin për modernizimin e ushtrisë së vendit të tij, por nuk sqaroi se si kishin mbërritur pajisjet ushtarake.
“Do ta përsëris për ata që nuk e dine, armët janë dhuratë, mjete plotësisht moderne nga Rusia. Ne nuk kemi paguar për to. Rusia ka paguar për modernizimin e forcave dhe unë i falenderoj. Kjo e shton dukshëm aftësinë tonë ushtarake. Për ne është e rëndësishme që respektuam ligjet ndërkombëtare dhe arritëm të sillnim pajisjet ushtarake në territorin tonë. Si dhe në çfarë mënyre e bëmë, është puna jonë”.
Ndihmat ushtarake nga Rusia për Serbinë kanë shkaktuar shqetësime në Perëndim se mund të rrezikojnë paqen e brishtë në Ballkan.
Serbia ka marrë tashmë 6 aeroplanë luftarakë MiG-29 nga Rusia dhe ndonëse pretendon të jetë ushtarakisht neutrale, po negocion blerje të tjera armësh nga Moska, përfshirë heikopterë luftarakë dhe transporti si dhe sisteme të mbrojtjes ajrore.
