Ata janë ndër bashkëpunëtorët më të njohur në muzikën shqiptare, por ndryshe nga kolegët, të cilët ose vazhdojnë miqësinë e tyre për shumë vite ose grinden dhe nuk flasin më, Seldi dhe Sinani kanë një marrëdhënie dashuri-urrejtje.
Pse dashuri-urrejtje?
Epo, nuk kanë qenë të pakta rastet kur në media është thënë se dy këngëtarët kanë prishur marrëdhënien me njëri-tjetrin, janë zënë ose janë ftohur mes tyre. Madje, përveç kësaj, ata kanë dalë dhe kanë pranuar hapur “mosmarrëveshjet” mes tyre.
Ama, nga ana tjetër, Seldi dhe Sinani pas këtyre lajmeve, janë kthyer përsëri me bashkëpunime herë të bujshme, herë jo, duke e larguar vëmendjen nga “sherret” te këngët. Kaq na ka mjaftuar të kuptojmë se të dy janë mjaft të talentuar në marketing!
Pas një sherri të bujshëm vjen menjëherë një bashkëpunim që tërheq një vëmendje goxha të madhe. Ose ndoshta mund të ketë qenë një “kukull” ose “biondinë” që futet mes djemve dhe i bën të kenë ulje dhe ngritje në marrëdhënien e tyre. Së fundmi, Qalliu dhe Hoxha u përfolën për një prishje të relatave të tyre dhe sot ata publikuan këngën e re, “Vullkan”.
Kjo gjë nuk është diçka e re sepse në të gjithë botën skandalet, skupet dhe lajmet e bujshme u paraprijnë projekteve muzikore, të cilat fitojnë goxha audiencë. Por pyetja që na lind është kjo: Kur “sherri” të jetë i vërtetë, kush do t’i besojë?
Gjithsesi, ne shpresojmë që kjo gjë të mos ndodhë sepse Sinani dhe Seldi janë një prej çifteve të bashkëpunëtorëve më të dashur për publikun, raporton Blitz.al
