Prokuroria e Tiranës ka sekuestruar 37 pasuri që kapin vlerën e disa milionë eurove në pronësi të familjarëve të Devi Kasmit, i cili u ekzekutua në vitin 2018 në Tiranë.
Pronat e bllokuara, raporton Vizion Plus, rezultojnë që të jenë në emër të prindërve të viktimës dhe vëllait të tij, por dhe të ish-bashkëshortes Ereda Selimi.
Bëhet fjalë për prona të paluajtshme dhe automjete të cilat ishin shpërndarë tek rrethi i ngushtë i Kasmit.
Organi i akuzës sqaroi se hetimi pasuror ndaj Devi Kasmit dhe familjarëve ka nisur pas sekuestrimit të një sasie kokaine dhe arme zjarri në banesën e tij. Gjithashtu verifikimet e pasurive janë kryer për shkak se ai ishte një person me rekorde kriminale, i përfshirë në trafikun ndërkombëtar të kokainës në Francë, Itali dhe Spanjë.
Në përfundim të hetimeve rezultoi se 37 pasuritë, nuk justifikohen me burime të ligjshme të të ardhurave, ndaj u vendos masa e sekuestros.
Gjithashtu në dosjen e Prokurorisë del në skenë edhe emri i Olsi Shehut, anëtar i bandës së Devi Kasmit, por edhe kunati i tij. Organi i akuzës ka hetuar dhe pasuritë ne emrin e tyre.
Devi Kasmi u ekzekutua nga vrasësi me pagesë Efthimios Efthimiou i dënuar me burgim të përjetshëm për këtë krim.
Kasmi ishte në kërkim nga autoritetet spanjolle për një vraje të vitit 2010, por hetimet ndaj tij u pushuan pas ekzekutimit.
