Prokuroria e Posaçme ka vendosur sekuestro preventive edhe ndaj inceneratorit të Tiranës. Pjesë e kësaj sekuestroje janë të gjitha pasuritë që përfshinë kompania “Integrated Energy B.V. S.P.V.” sh.p.k”. Vendimi është marrë më datën 28 korrik nga Gjykata e Posaçme, ndërkohë që mësohet se sekuestroja është zbatuar këtë të martë.
Sipas SPAK pas hetimeve të thelluara është vërtetuar se Klodian Zoto dhe Mirel Mërtiri janë pronarët “de facto” të incenetarotit të Tiranës i cili ka fituar kontratën koncesionare të rehabilitimit të mbetjeve në kryeqytet me kosto mbi 128 milionë euro.
Hetuesit shprehen gjithashtu se Zoto dhe Mërtiri janë pronarë të shoqërisë mëmë të saj, të themeluar në Holandë. Refereuar hetimeve, SPAK thekson se Zoto e Mërtiri i kanë marrë shtetit mbi 409 milionë lekë përmes faturave të falsifikuara dhe skemave të mashtrimit.
Nga aktet e administruara deri në këtë fazë të hetimeve, rezulton se Klodian Zoto, në bashkëpunim me Mirel Mërtirin, kanë përfituar në sajë të faturave tatimore të falsifikuara, vlerën monetare 409,428,000 (katërqind e nëntë milion e katërqind e njëzet e tetë mijë) lekë, ku shtetasi Klodian Zoto është paraqitur dhe ka deklaruar fatura të falsifikuara për punime të kryera nëpërmjet shoqërisë tjetër të tij “Integrated Energy Services” sh.p.k., si nënkontraktor i shoqërisë koncesionare “Integrated Energy B.V. S.P.V.” sh.p.k. Në kohën e lëshimit të këtyre faturave të falsifikuara, provohet se aksionerë “de facto” kanë qenë shtetasit Klodian Zoto dhe Mirel Mërtiri.
Gjithashtu SPAK ka vendosur sekuestro edhe për kompaninë F.M.O. shpk me vlerë 1 milionë euro. Prokurorët dyshojnë se pas saj fshihen pikërisht Zoto dhe Mertiri.
Po ashtu, është evidentuar fakti se shtetasit Klodian Zoto dhe Mirel Mërtiri zotërojnë në mënyrë indirekte shoqërinë “F.M.O.” sh.p.k. Nga hetimi janë mbledhur prova se këta shtetas, duke shfrytëzuar perfitimet e paligjshme kanë blerë për llogari të subjektit “F.M.O.” sh.p.k., një pasuri të paluajtshme, me sipërfaqe 611 m2, me vlerë 1 000 000 Euro, e ndodhur në qytetin e Durrësit.
Pavaresisht vendimit per sekuestro dhe procesit te hetimeve, puna ne impiant vazhdon.
Më heret SPAK vendosi në sekuestro edhe inceneratorin e Elbasanit dhe atë të Fierit. Nga ana tjetër Klodian Zoto, Stela Gugallja dhe Mirel Mertiri janë ende në kërkim nga policia në lidhje me aferat e inceneratorëve.
Në kërkim ndërkombëtar eshte edhe ish-zv/kryeministri Arben Ahmetaj. Prokuroria e posacme ka vendosur sekuestrimin e disa pasurive të tij, të bashkëjetueses dhe të ish-bashkëshortes.
Ndërsa në qeli per inceneratoret vijon të mbetet ish-ministri i Mjedisit Lefter Koka, ish-deputeti i PS-së Alqi Bllako si dhe ish-zyrtarë të tjerë.
