Guvernatori i Bankës së Shqipërisë, Gent Sejko vlerësoi se rënia ekonomike për shkak të pandemisë do të jetë kalimtare. Deklaratën ai e bëri gjatë takimit të 43-të të Klubit të Guvernatorëve të vendeve të Azisë Qendrore, Rajonit të Detit të Zi dhe Ballkanit, ku u diskutua për trajtimin e situatës së krijuar nga COVID-19.
Sejko tha se edhe në Shqipëri masat e marra kundër koronavirusit do të ndikojnë në aktivitetin ekonomik, dukë shënuar rënie. Por ai theksoi se kjo do të jetë kalimtare dhe do të rikuperohet më pas në vitet në vijim.
Guvernatori prezantoi masat e ndërmarra nga Banka e Shqipërisë për të minimizuar kostot e pandemisë COVID-19 në ekonominë e vendit. Në këtë pikë, ai renditi: Uljen e normës bazë të interesit në nivelin historik prej 0.5%; furnizimin me të gjithë likuiditetin e nevojshëm të sistemit bankar në vend duke hequr kufijtë sasiorë; eliminimin e kostove të operimit të sistemeve të pagesave elektronike; sigurimin e pandërprerë i ekonomisë me para fizike; shtyrjen me dy tremujorë të pagesave të kësteve të kredisë për bizneset dhe familjet në vështirësi financiare.
Gjithashtu, Gent Sejko theksoi rëndësinë e masave të ndërmarra nga autoritetet publike për përballimin e kësaj situate, si paketat fiskale dhe miratimi i fondeve për garancitë sovrane të ofruara nga qeveria shqiptare për të mbështetur me kredi bankare kompanitë.
