Ka përfunduar pa një marrëveshje samiti i dytë mes presidentit të SHBA-se Donald Trump dhe liderit të Koresë së Veriut Kim Jong Un në Vietnam.
Shtëpia e Bardhë me anë të një deklarate për mediat këtë të enjte, njoftoi se samiti dështoi pas kërkesës së palës koreanoveriore për heqjen e plotë të sanksioneve.
“Dy udhëheqësit diskutuan mënyra të ndryshme sesi të avancohen konceptet e denuklearizimit dhe ato ekonomike. Megjithatë, asnjë marrëveshje nuk u arrit në këtë takim. Dy ekipet respektive shohin nga e ardhmja për një takim të radhës”
Konsultimet mes palëve nuk sollën “asnjë ujdi”, theksohet në deklaratën e Shtëpisë së Bardhë, ku sqarohet se edhe dreka e përbashkët e planifikuar u anulua.
Donald Trump u shpreh se palët ishin gati për nënshkrim, por nuk ndodhi.
“Këtë nuk mund ta bënim…na duhej të largoheshim. Dua ta bëj siç duhet në vend që ta bëj shpejt”, tha kreu i Shtëpisë së Bardhë.
Edhe sipas Sekretarit Amerikan të Shtetit, Mike Pompeo SHBA dhe Koreja e Veriut “janë më afër njëra-tjetrës se para 36 orësh”.
Presidenti amerikan dhe lideri i vendit komunist debatuan për çështjen e denuklearizimit të Koresë së Veriut. Trump ka theksuar perspektivën e mbështetjes ekonomike për Korenë e Veriut në takimin e cilësuar prej tij si “shumë të mirë dhe konstruktiv”.
SHBA-të kërkon që Koreja e Veriut të dorëzojë të gjithë arsenalin bërthamor dhe të heqë dorë nga programet raketore, por Peniani këmbëngul për heqjen e sanksioneve amerikane.
Shtëpia e Bardhë njoftoi se tashmë delegacioni amerikan dhe ai i Koresë së Veriut do të vazhdojnë bisedimet.
Ky ishte samiti i dytë mes Trump dhe Kim Jong Un, pas atij të qershorit në Singapor vitin e kaluar.
