Tirana do të jetë nesër (16 maj) kryeqendra e Europës, me gjithë vëmendjen e përqendruar te Samiti i Komunitetit Politik Europian. 47 liderë do të bashkohen në sheshin “Skënderbej”, ku do të zhvillohet samiti.
Drejtori i Lëvizjes Europiane në Shqipëri, Gledis Gjipali, në një lidhje të drejtpërdrejtë në edicionin qendror të lajmeve në Vizion Plus, me moderator Roland Zili, tha se kjo është një ngjarje shumë pozitive për Shqipërinë.
Gjipali u shpreh se me takime të tilla të rëndësishme që zhvillohen në vendin tonë, ne qëndrojmë në vëmendje të partnerëve ndërkombëtarë.
Sipas Gjipalit, kjo axhendë politike dhe diplomatike ndikon drejtpërdrejt në progresin për anëtarësimin në BE.
Intervista e plotë:
Çfarë do të thotë për Shqipërinë fakti që 47 liderë europianë mblidhen në Tiranë për të diskutuar sfidat e kontinentit?
Gjipali: Është një ngjarje shumë pozitive për Shqipërinë. Tregon se vendi vazhdon të qëndrojë në vëmendjen e partnerëve ndërkombëtarë. Është e rëndësishme gjithashtu edhe për çështjet që diskutohen, siguria, ekonomia, zhvillimi. Të gjitha këto janë shumë të rëndësishme për një vend të vogël si Shqipëria.
Si i shërben kjo axhendë politike dhe diplomatike progresit në negociatat e anëtarësimit me BE-në?
Gjipali: Ka ndikim të drejtpërdrejtë, sepse e dimë që një anë e medaljes janë detyrat që ne duhet të përmbushim. Nga ana tjetër, është çështje imazhi dhe perceptimi i Shqipërisë në kancelaritë më të rëndësishme evropiane. Është një rast i mirë për të përmirësuar imazhin që Shqipëria ka. Mos të harrojmë që të gjithë këta zyrtarë shoqërohen me gazetarë dhe me përfaqësues biznesesh që janë të interesuar për të investuar, kjo kthehet në një mundësi shumë të mirë për Shqipërinë.
A mund të themi se tashmë Tirana politike është bërë një referencë për Bashkimin Europian në Ballkanin Perëndimor?
Gjipali: Po, patjetër. Të gjitha takimet e rëndësishme kohët e fundit janë mbajtur në Tiranë. Ka një vazhdimësi të këtyre aktiviteteve që hap rrugën drejt Samitit të NATO-s në vitin 2027, gjë që konfirmon pozicionin e Shqipërisë në raport me vendet e tjera të rajonit. Krahasuar me më parë, tashmë po kthehet në të kundërtën, Shqipëria ka më shumë angazhime të tilla që realizohen me sukses dhe hapin rrugën për samite të tjera të rëndësishme.
Si duhet t’i përgjigjet Shqipëria këtij raporti të ri, më të ngushtë e bashkëpunues që shfaqet nga Brukseli zyrtar, e jo vetëm?
Gjipali: Është një mundësi e artë që ne duhet ta shfrytëzojmë patjetër. Këto mundësi nuk qëndrojnë gjithmonë për një kohë të gjatë. Duhet të jemi gati t’u përgjigjemi kërkesave të BE-së për të realizuar me sukses procesin e anëtarësimit, por edhe bashkëpunime të tjera që mund të vijnë.
/vizionplus.tv
