Këtë të hënë u zhvillua përmes një videokonference takimi i fundit i procesit te Berlinit, organizuar nga kancelarja gjermane, Angela Merkel.
Kryeministrat e Ballkanit Perëndimor kanë diskutuar me liderët e 9 shteteve anëtare të Bashkimit Evropian, për të diskutuar gjendjen e rajonit si dhe të ardhmen e fokusuar në pranimin në BE. Ky ishte samiti i fundit nën udhëheqjen e Merkel, e cila lë detyrën këtë vjeshtë pas 16 vitesh udheheqje.
Pas takimit, kancelarja gjermane theksoi se e ardhmja e Ballkanit Perëndimor është në Bashkimin Evropian. Gjatë këtyre 7 viteve, disa vende, sipas kancelares, kanë patur një ritëm të ngadaltë në zhvillim dhe disa të tjerë më të shpejtë. Ajo është ndalur tek procesi i Vettingut në Shqipëri, të cilin e quajti si të suksseshem.
Ndërkohë, presidentja e Komisionit, Ursula von der Leyen, theksoi se prioriteti i procesit mbetet përshpejtimi i zgjerimit i të gjithë rajonit.
Edhe Komisioneri për Fqinjësinë dhe Zgjerimin, Olivér Várhelyi, vuri në dukje se për BE është thelbësore që të sjellë një mundësi për gjithë Ballkanin Perëndimor.
Një ndër temat kyçe ishte edhe tregu i Përbashkët Rajonal për një bashkëpunim më të mirë mes vendeve.
Ndërkohë, në fund të samitit, kancelarja Merkel premtoi se Gjermania do të dhurojë tre milionë doza të vaksinës anticovid për Ballkanin Perëndimor.
