Liderët e Bashkimit Europianë kanë mbërritur në Pekin për një samit me në qendër tregtinë dhe marrëdhëniet diplomatike.
Në tryezën e përbashkët presidenti i Kinës, Xi Jinping kërkoi thellim të besimit teksa bota përjeton turbulenca ndërsa shefja e bllokut evropian, Ursula von der Leyen bëri thirrje për zgjidhje reale për të kaluar pikën e kthesës.
“Sa më e rëndë dhe komplekse të jetë situata ndërkombëtare, aq më e rëndësishme është që Kina dhe BE-ja të forcojnë komunikimin, të rrisin besimin e ndërsjellë dhe të thellojnë bashkëpunimin. Sfidat me të cilat përballet Evropa tani, nuk vijnë prej Kinës”, tha Xi Jinping.
Udhëheqja e Kinës synon të afrohet me BE-në teksa e pozicionon veten si partnere më të besushme sesa Shtetet e Bashkuara. Por BE-ja e ka bërë të qartë se ekzistojnë ndasi të thella për çështje tregtare dhe luftën në Ukrainë.
“Ndërsa bashkëpunimi ynë është thelluar, janë thelluar edhe çekuilibrat. Kemi arritur në një pikë kthese. Ribalancimi i marrëdhënieve tona dypalëshe është thelbësor.Është jetësore për Kinën dhe Evropën që të pranohen shqetësimet respektive dhe të ketë zgjidhje”, u shpreh Ursula von der Leyen.
Marrëdhëniet midis Bashkimit Evropian dhe Kinës arritën pikën më të ulët përpara samitit.Presidenti Xi Jinping refuzoi një ftesë për të marrë pjesë në samitin që do të shënonte 50-vjetorin e marrëdhënieve diplomatike BE-Kinë, ndërsa bisedimet u zhvendosën nga Brukseli në Pekin dhe më pas u reduktuan nga dy ditë në një.
/vizionplus.tv
