Kryedemokrati Sali Berisha, ka zhvilluar një takim me kryetarët e degëve të PD-së në të gjithë vendin. Kjo mbledhje vjen në kuadër të protestës së thirrur nga Berisha më 24 Janar.
Në fjalën e tij para drejtuesve të degëve, Berisha e konsideroi këtë vit si vitin përcaktues për të ardhmen e Shqipërisë.
Berisha: Ky takim dhe kjo mbledhje kanë dy qëllime kryesore të një rëndësie shumë të madhe. Jemi mbledhur sot për përgatitjet që duhet të bëjmë për datën 24 janar. Për secilin prej jush, për çdo anëtar të Partisë Demokratike dhe për çdo opozitar, duhet të jetë e qartë se ky është viti i provës së madhe, viti i sfidës më të madhe që kemi pasur ndonjëherë në jetën tonë politike. Ky është viti më përcaktues për të ardhmen tonë dhe të Shqipërisë. Ne e nisim këtë vit pasi, në një betejë të pabarabartë dhe të vështirë, ia kemi dalë të paraqesim me sukses para shqiptarëve dhe komunitetit ndërkombëtar të vërtetat dramatike të narkoshtetit, të diktaturës autoritare apo autokracisë elektorale të Edi Ramës.
Por, ne arritëm që brenda 14 muajve të miratohen shtatë rezoluta ndërkombëtare nga të gjitha partitë e spektrit tonë politik në Evropë, SHBA dhe mbarë botën. Arritëm të faktojmë se ky ‘demon pushteti’ ka përqendruar në duart e tij, në mënyrë antikushtetuese, më shumë pushtet se diktatori i fundit komunist në Shqipëri. Ai është një armik i egër i pluralizmit që përdor ‘dumanët’ e tij si licencë për krime të shëmtuara elektorale.
/vizionplus.tv
