Me rritjen e temperaturave gjatë verës, një nga dilemat më të zakonshme është sa shpesh duhet të bëjmë dush dhe të lajmë flokët. Ndërkohë që shumë njerëz lahen çdo ditë, ekspertët theksojnë se larja e shpeshtë, veçanërisht e flokëve me shampo, mund të shkaktojë më shumë dëm sesa dobi.
Sipas tyre, flokët nuk kanë nevojë të lahen çdo ditë. Në fakt, rekomandohet që larja me shampo të bëhet dy deri në tre herë në javë, pasi përdorimi i shpeshtë i saj mund të ndikojë në prodhimin natyral të vajrave të kokës. Kur lahemi shpesh, lëkura e kokës stimulohet të prodhojë më shumë yndyrë për të kompensuar tharjen e shkaktuar nga shampo, duke krijuar një cikël të pakëndshëm vajosjeje.
Kjo nuk do të thotë që duhet të shmangim dushin e përditshëm. Përkundrazi, larja e trupit çdo ditë, sidomos gjatë verës kur djersitemi më shumë, është e nevojshme për higjienën personale. Ndërsa për flokët, nëse ato bëhen të yndyrshëm mes larjeve, shampoja e thatë mund të jetë një zgjidhje praktike. Ajo ndihmon në absorbimin e vajit të tepërt dhe jep ndjesinë e pastërtisë, pa pasur nevojë për ujë.
Në përfundim, ekspertët sugjerojnë: lahemi çdo ditë për trupin, por për flokët mjafton disa herë në javë për një balancë të shëndetshme mes pastërtisë dhe kujdesit ndaj lëkurës./vizionplus.tv
