Eksperti i ekonomisë, Klodian Muço analizoi programet e dy forcave të mëdha politike, PS dhe PD, në kuadër të fushatës elektorale
Ai tha në studion e Quo Vadis në Vizion Plus se programi i opozitës ka në qendër qytetarin dhe biznesin, teksa nënvizoi si premtimin më të rëndësishëm pjesën e taksës së sheshtë.
Ndërkohë, sa i përket programit të socialistëve, eksperti i ekonomisë u shpreh se paraqet një vizion të qeverisjes që ka ndjekur deri tani, pa bërë një bilanc të mirëfilltë.
Pjesë nga biseda:
Borakaj: Sa hapësirë zë ekonomia tek programet e partive kryesore?
Muço: Partia Demokratike ka rreth një vit që punon për programin elektoral, ku baza është qytetari dhe biznesi. Fokusi është tek qytetarët në tërësi, për t’u kthyer dinjitetin dhe këtu e kam fjalën, duke shkelur pak, le të themi “parimet e djathta” në thonjëza, por duke përcaktuar një minimum jetik, të cilin e ka çdo vend i Bashkimit Europian, ku ne aspirojmë të anëtarësohemi. Kemi gjithashtu në fokus pensionet dhe biznesin. Programi i PD-së ka në thelb ekonominë dhe mbështetjen e biznesit. Literatura ekonomike thotë se në vende me informalitet të lartë dhe në vende jo shumë të zhvilluara, një thjeshtim i sistemit fiskal dhe një lehtësim i barrës fiskale gjeneron të ardhura. Premtimi më i rëndësishëm është pjesa e taksës së sheshtë. Nga ana tjetër, e majta paraqet një vizion të qeverisjes që ka ndjekur deri tani, pa bërë një bilanc të mirëfilltë. Por edhe aty ka disa premtime për ekonominë.
/vizionplus.tv
