Zëvendëskryeministri i Rusisë, Alexander Novak, ka urdhëruar Ministrinë e Energjisë që të hartojë një vendim për ndalimin e eksportit të benzinës duke filluar nga 1 prilli, njoftoi Moska. Agjencia shtetërore TASS raportoi se ndalimi do të zgjasë deri më 31 korrik.
Novak deklaroi se trazirat në tregun global të naftës dhe derivatet e saj, të nxitura nga kriza në Lindjen e Mesme, shkaktojnë luhatje të ndjeshme të çmimeve. Megjithatë, ai shtoi se kërkesa e lartë për burimet energjetike ruse në tregjet e huaja mbetet një faktor pozitiv.
Qeveria njoftoi se volumi i naftës së papërpunuar që dërgohet për rafinim mbetet në nivelet e vitit të kaluar, duke siguruar furnizim të qëndrueshëm me produkte nafte.
Disa rajone në Rusi dhe zona të Ukrainës nën kontroll rus raportuan mungesa benzine vitin e kaluar, pas intensifikimit të sulmeve ukrainase ndaj rafinerive ruse dhe për shkak të rritjes sezonale të kërkesës për karburant.
Rusia ka vendosur herë pas here kufizime në eksportin e benzinës dhe naftës dizel për të kontrolluar rritjen e çmimeve dhe për të adresuar mungesat.
Sipas burimeve të industrisë, vendi eksportoi vitin e kaluar rreth 5 milion tonë metrikë benzinë, ose afërsisht 117,000 fuçi në ditë.
