Ambasadori rus në Mbretërinë e Bashkuar, Aleksandër Jakovenko, ka akuzuar Londrën se nuk është treguar aspak transparente në lidhje me hetimet për rastin Skripal dhe se po e përdor ngjarjen për të devijuar vëmendjen nga rrëmuja e Brexit.
“Britania po përpiqet të gjejë një vend të ri në rendin botëror pasi po largohet nga BE. Organizata kyçe është NATO. Britania e Madhe është një nga themeluesit e NATO-s dhe ka pothuajse një histori 70-vjeçare me aleancën, skema antiruse ndoshta ishte gjetja më e mirë për të forcuar pozitat e Londrës.”
Jakovenko tha se ishte i befasuar se sa shpejt kryeministrja britanike Theresa May fajësoi Rusinë për helmimin e Skripal dhe vajzës së tij, pavarësisht nga mungesa e provave. Ambasadori rus shtoi se Rusia do të ushtronte presion maksimal në Mbretërinë e Bashkuar deri në zbardhjen e ngjarjes.
Ndërkohë, sekretari i Jashtëm britanik, Boris Johnson ka thënë se Britania është duke punuar që t’ju japë mundësinë ekspertëve ndërkombëtarë për të vërtetuar të gjeturat e deritashme që tregojnë se ish-spiuni rus, Sergei Skripal dhe vajza e tij Yulia janë helmuar nga agjenti nervor i prodhuar nga rusët.
Dosja e hetimeve do t’i dorëzohet Organizatës për Ndalimin e Armëve Kimike, për konfirmimin e të dhënave.
Edhe pse kane kaluar 13 dite, policia ende nuk ka arritur të zbulojë se si u ekspozuan Skripal dhe vajza e tij ndaj agjentit nervor. Agjencitë e inteligjencës i frikësohen faktit se 131 njerëz që ishin të pranishëm ne restorantin ku u helmuan Skripal dhe vajza e tij, kanë rene ne kontakt me substancën nervore. Megjithatë, personat nuk kanë shfaqur ende ndonjë simptomë, por po monitorohen përmes telefonatave të përditshme.
