Njëzet e tetë dronë rusë kryen sulme në Kiev herët këtë mëngjes, thanë zyrtarët, duke plagosur dy persona dhe duke dëmtuar ndërtesat e banimit.
Ky është sulmi i gjashtë i tillë këtë muaj kundër Kievit dhe është pjesë e një sulmi më të gjerë me dron kundër pjesëve të Ukrainës qendrore, jugore dhe perëndimore, thanë Forcat Ajrore të Ukrainës. Mbrojtja ajrore e Ukrainës rrëzoi 24 nga 28 dronë sulmues, sipas të njëjtit burim.
Kryetari i bashkisë së Kievit, Vitali Klitschko tha përmes platformës Telegram se një dron goditi një kompleks apartamentesh në lagjen Solomyanskyi, në jug të qendrës së qytetit, duke shkaktuar një zjarr në katet e sipërme, i cili u vu shpejt nën kontroll. Shërbimet e urgjencës mësuan gjithashtu se janë dëmtuar banesat në katet 14, 25 dhe 26 të pallatit. Dy persona kanë mbetur të plagosur, njëri prej të cilëve është dërguar në spital.
Ngjarja ka ndodhur disa qindra metra larg një materniteti. Klitschko tha gjithashtu se mbeturinat nga një dron shkaktuan një zjarr në një shtëpi në ndërtim në lagjen Darnitsky në bregun lindor të lumit Dnieper, i cili rrjedh nëpër qytet. Serhii Popko, kreu i administratës ushtarake të Kievit, tha se mbeturinat nga një dron i rrëzuar goditën një ndërtesë apartamentesh në një lagje të tretë, gjithashtu në jug të qendrës së qytetit.
Administrata jugore e Ukrainës tha gjithashtu se një strukturë infrastrukturore e paspecifikuar në rajonin e Mykolayiv u godit dhe mbeturinat nga një dron i rrëzuar dëmtuan një strukturë magazinimi të grurit në rajonin e Odesa.
Nuk raportohet për të lënduar dhe zjarret e shkaktuara janë shuar, thanë autoritetet. /vizionplus.tv
