Rusia ka ndërmarrë një sulm masiv me raketa balistike dhe dronë ndaj Ukrainës, duke lënë të paktën 14 persona të vrarë dhe 22 të plagosur. Sulmi konsiderohet një nga më vdekjeprurësit ndaj Kievit gjatë këtij viti.
Sipas autoriteteve ukrainase, bombardimet nisën pas mesnatës së të mërkurës. Kreu i administratës ushtarake të Kievit, Timur Tkachenko, deklaroi se Rusia kreu një tjetër sulm në shkallë të gjerë ndaj rajonit të kryeqytetit.
Alarmet ajrore zgjatën më shumë se një orë, ndërsa valë raketash balistike goditën Kievin dhe zonat përreth. Sulmet shkaktuan dëme në ndërtesa banimi dhe magazina.
Tkachenko bëri të ditur se nëntë persona humbën jetën në distriktin Boryspil, katër në Bucha dhe një në Fastiv.
Nga ana tjetër, Ministria ruse e Mbrojtjes deklaroi se objektiv i sulmeve ishin qendrat logjistike dhe depot e furnizimit me armë në Kiev dhe rrethinat e tij.
Sipas Moskës, këto objekte përdoreshin për ruajtjen dhe shpërndarjen e armëve, furnizimeve ushtarake dhe prodhimin e mjeteve ajrore pa pilot. Rusia pretendoi gjithashtu se goditi tre anije mallrash pranë portit të Odesës në Detin e Zi, të cilat, sipas saj, transportonin pajisje ushtarake.
Kryetari i Bashkisë së Kievit, Vitali Klitschko, tha se ekziston frika se persona të tjerë mund të jenë ende të bllokuar nën rrënoja. Ai shtoi se katër nga të plagosurit ndodhen në gjendje të rëndë.
Administrata ushtarake e Kievit akuzoi Rusinë se po godet qëllimisht civilët dhe infrastrukturën civile.
Ndërkohë, Ukraina ka përsëritur kërkesën ndaj aleatëve për më shumë sisteme amerikane Patriot, me qëllim forcimin e mbrojtjes kundër sulmeve me raketa balistike.
Sulmet mes dy vendeve janë intensifikuar javët e fundit. Ukraina ka shtuar goditjet ndaj infrastrukturës në territorin rus, ndërsa Rusia vazhdon bombardimet ndaj qyteteve ukrainase. Të dyja palët mohojnë se kanë në shënjestër qëllimisht popullsinë civile.
/vizionplus.tv
