Rusia ka shprehur keqardhjen për shkeljen e hapsirës ajrore të Koresë së Jugut nga avionët e saj luftarak, gjë e cila rriti tensionet mes dy vendeve.
Një zyrtar ushtarak rus ka njoftuar Ministrinë e Mbrojtjes së Seulit se ndërhyrja e avionëve në hapësirën ajrore të Koresë së Jugut nuk ishte e qëllimshme dhe se bëhet fjalë për një gabim teknik.
Seuli bëri të ditur një ditë më parë se avioni luftarak rus shkeli dy herë hapësirën ajrore, gjë e cila u mohua nga Ministria ruse e Mbrojtjes.
Sipas saj, avioni luftarak po merrte pjesë në një patrullë të përbashkët me avionët kinezë mbi Detin e Japonisë dhe Detin e Kinës Lindore, patrullimi i parë ajror ky mes dy vendeve.
Sot Rusia njoftoi se do të hetojë mbi incidentin.
Tensionet mes dy vendeve u përshkallëzuan të martën pasi ushtria e Koresë së Jugut u vu në alarm për shkak të cënimit të hapësirës ajrore. Menjëherë forcat ajrore koreane u vunë në ndjekje të avionit rus.
Por Moska u kundërpërgjigj duke akuzuar pilotët koreano-jugorë për “huliganizëm në ajër”.
Nga ana tjetër, stërvitja ushtarake e përbashkët Rusi-Kinë përbën një sfidë për Uashingtonin pas tensioneve të përshkallëzuar me Kinën për shkak të tarifave ndaj mallrave kineze, e Pekini duket se po krijon një aleancë me Moskën që po forcohet cdo ditë.
