Gjigantët e mediave sociale Facebook dhe Twitter po përballen me rreth 1 milion dollarë gjobë në Rusi pas refuzimit për të fshirë përmbajtjet e paligjshme.
Gjykata e Rrethit Tagansky të Moskës njoftoi të shtunën se po shqyrton pesë ankesa ndaj Facebook dhe dy të tjera në ndaj Twitter.
Seancat gjyqësore do të mbahen më 14 shtator. Kompania Facebook aktualisht është dënuar me një gjobë tjetër në Rusi, në shifrën e mbi gjysmë milionë dollarve. Por drejtuesit e gjigandit të teknologjisë nuk ka qenë të gatshëm të paguajnë. Facebook u përpoq të apelonte kundër vendimeve të mëparshme të gjykatës, por pa sukses.
Që nga shkurti, mbikëqyrësi i mediave ruse Roskomnadzor ka hartuar protokolle administrative në lidhje me rrjetet sociale që nuk kanë hequr postimet ku bëhet thirrje për të marrë pjesë në aksione të paautorizuara politike në vend.
Edhe muajin e kaluar autoritetet ruse gjobitën Facebook, Twitter dhe shërbimin e mesazheve WhatsApp për dështimin në përpunimin e të dhënave private të përdoruesve rusë ekskluzivisht brenda vendit.
Rusia ka qenë gjithnjë vigjilente përsa i përket funksionimit të mediave sociale në vend, duke lëshuar që nga fillimi i vitit 2021 shumë gjoba për shkelje të përmbajtjes. Presidenti rus Vladimir Putin në fillim të këtij viti akuzoi firmat e teknologjisë se funksiononin në mënyrë të papërgjegjshme, dhe vendimmarrja e tyre udhëhiqej vetëm nga interesat e tyre.
