Kryetari i Kuvendit, Gramoz Ruçi reagoi mëngjesin e kësaj të marte për ndarjen nga jeta të aktorit Rikard Ljarja. Ai shprehu ngushëllime për familjarët e tij dhe e quajti një emblem të kinematografisë dhe artit shqiptar.
“Ne jemi rritur me personazhet e Ljarjes midis nesh. Ai ka frymëzuar e do të frymëzojë brezat me jetën dhe me personazhet e tij. Me veprën e vet, Rikard Ljarja na la kumtin se madhështia krijohet prej thjeshtësisë dhe përsosmëria prej përkushtimit. Peng për të gjithë ne që nuk e përcjellim siç e meritonte.”
Rikard Ljarja, ndërroi jetë mbrëmjen e të hënës. Ai vuante prej kohësh nga një sëmundje e rëndë. Ljajra është bashkëshorti i një tjetër aktoreje të njohur, Marjeta Ljajra.
Rikard Ljajra ka luajtur dhjetëra role në kinematografinë shqiptare me interpretime brilante, shumë prej të cilëve kanë mbetur në memorien e të gjithëve.
