Ruajtja e trashëgimisë baritore, studiues vendas dhe të huaj mblidhen në Shkodër
Studiues dhe ekspertë nga vende të ndryshme të botës, u mblodhën në Universitetin e Shkodrës “Luigj Gurakuqi” , ku u zhvillua Konferenca Shkencore Ndërkombëtare “Transhumanca dhe Trashëgimia Pastorale”.
Ajo solli në qendër të diskutimeve trashëgiminë baritore, identitetin kulturor dhe sfidat që lidhen me zhvillimin e qëndrueshëm në të ardhmen.
“Kërkimi shkencor dhe teknologjia mund të shndërrohen në instrumente të fuqishme për ruajtjen dhe rikthimin e vlerave kulturore në qarkullim aktiv”, tha Tonin Gjuraj, rektor i USH.
“Cili është qëllimi kryesor i rrugëve të kulturës? Promovimi i kulturës dhe identitit evropian dhe qytetarisë”, deklaroi Roberta Alberotanza, European Cultural Heritage.
Përveç prezantimit të studimeve dhe shkëmbimit të ideve, një vëmendje e veçantë iu kushtua sfidave aktuale me të cilat përballet sektori baritor. Përvojat në terren u pasqyruan nga udhërrëfyesit lokalë, të cilët ndanë realitetin dhe problematikat e përditshme të kësaj tradite.
“Problem është rënia e familjeve baritore. Plakja e popullësisë, pakësimi i kullotave”, u shpreh Flora Nakaj, udherrefyese nga Kelmendi.
“Duhet parë me kujdes lëvizja sepse po lëvizin nga veriu në jug dhe duhen siguruar marrëveshje”, tha Bukurosh Onuzi, udherrefyes nga Tropoja.
Praktika e lashtë e transhumancës, lëvizja sezonale e njerëzve dhe bagëtive të tyre përmes rajoneve gjeografike dhe klimatike për kullota, është regjistruar zyrtarisht në Listën Përfaqësuese të Trashëgimisë Kulturore Jomateriale të UNESCO-s./vizionplus.tv
