Ministrja e Brendshme, Albana Koçiu komenton për Vizion Plus rritjen e pagave në Policinë e Shtetit. Gazetari Esido Barkaj tha se inspektorët, nënkomisarët dhe komisarët paguhen me një diferencë të madhe krahasuar me administratën shtetërore, dhe pyeti nëse parashikohet rritje page në të ardhmen.
“Rritja e pagave për disa kategori të policisë prek 7% të trupës totale. Në vendimin e fundit të qeverisë, Policia e Shtetit pati një indeksim për vjetërsi në punë, duke sjellë rritje nga 7 mijë lekë të vjetra deri në 20 mijë lekë të vjetra. Inspektorët, nënkomisarët dhe komisarët paguhen ne një diferencë të madhe krahasuar me administratën shtetërore. A parashikohet të ketë rritje page në të ardhmen? Shpeshherë Ministria e Financave bëhet bllokuese e shkresave për shpërblime,” tha Barkaj.
Ministrja Koçiu tha se Policia e Shtetit ka marrë rritje page në mënyrë të vazhdueshme dhe edhe këtë vit janë përfshirë rritje për disa grada të caktuara. Vendimmarrja më e fundit parashikon që vlera e përcaktuar për ushqimin është përfshirë brenda në pagë, dhe secili mund ta përdorë për çdo lloj nevoje.
“Deri në 10 vite më parë pagat e punonjësve të policisë ishin 300 euro, ndërsa sot nuk jemi më në këto nivele. Rritja është kryer gradualisht vit pas viti. Punonjësit e Policisë së Shtetit punojnë natë e ditë dhe kryejnë një nga profesionet më të nderuara dhe më të vështira. Ata marrin trajtime sipas turneve, orëve jashtë orarit, fundjavave, dhe kanë elementë shtesë në pagë që u japin mundësinë për një trajtim dinjitoz,” tha ministrja.
Koçiu shtoi se rritja e pagës, që pritet të miratohet me vendimin më të fundit të Kryeministrit, vjen për kategoritë që janë vlerësuar nga vetë struktura e Policisë së Shtetit si të nevojshme për qëndrueshmëri dhe përballje me rrezikshmërinë më të madhe në terren. Kjo është arsyeja përse u është dhënë një shtesë e re në pagë për vështirësi pune.
“Nga eksperienca ime deri tani, Ministria e Financave ka qenë mbështetësja më e madhe për të motivuar dhe për të vijuar mbështetjen financiare për punonjësit e Policisë së Shtetit,” përfundoi Koçiu.
/vizionplus.tv
