Bordi i Transparencës në mbledhjen e fundit vendosi të rrisë çmimin e naftës, nga 227 lekë në 239 lekë për litër.
Kjo rritje bie mbi xhepat e qytetarëve, ndërsa në mbledhjen e Këshillit të Ministraveështë marrë vendimi që transportet urbane, interurbane të përfitojnë nga paketa antikrizë, faza e dytë.
Kështu, në mënyrë që të shmangen abuzimet me çmimet e biletave, qeveria ka vendosur që shoqëritë e transporteve të dëmshpërblehen për muajt gusht, shtator, tetor 2022 me sasinë e naftës që kanë konsumuar për të njëjtën periudhë kohore të një viti më parë.
“Kompensimin e shoqërive të transportit për linjat qytetase, rrethqytetase dhe ndërqytetase, në masën 100 (njëqind) lekë për litër karburanti, për një periudhë tremujore: gusht, shtator, tetor 2022. Kompensimi bëhet për shumën e konsumimit të karburantit për periudhën: gusht, shtator, tetor 2022, por jo më shumë se sasia e konsumuar për të njëjtën periudhë të vitit 2021, për secilën nga shoqëritë”, thuhet ndër të tjera në VKM.
