Kryetari demokrat Lulzim Basha i konsideron si qesharake akuzat e kryeministrit Rama për kontratat e lobimit në Amerikë. Në reagimin e tij lideri i opozitës tha se akuzat janë në vazhdën e qëndrimeve anti-Trump nga Edi Rama. “Partia Demokratike nuk ka shkelur asnjë ligj dhe nuk ka asnjë lidhje direkte apo indirekte me asnjë individ, organizatë, kompani apo interes rus”, shkruan Basha në facebook. Numri një i PD-së akuzon kryeministrin për lidhje të errëta me kompaninë ruse Gunvor, për të cilën nuk përgjigjet. “Nëse ka rrezik rus në Shqipëri, ai vjen përmes Ramës kryeministër! Jo vetëm sepse si njeri i zhytur në krim, ai është lehtësisht i shantazhueshëm nga kushdo, por sepse ai, konkretisht, ka mirëpritur ndikimin rus!”, shkruan Basha. Sipas kreut të PD-së, Rama duhet të sqarojë, se pse mbështet tezën e përkrahur edhe nga Rusia për shkëmbim territori midis Kosovës dhe Serbisë. Për Bashën sulmet kundër opozitës janë ngritur për largimin e vëmendjes së opinionit publik nga droga dhe krimi.
