Duke nisur nga mesdita e kësaj të hëne dhe deri në orët e mesnatës, disa qarqe të vendit rrezikojnë përmbytje për shkak të reshjeve të dendura të shiut.
Shirat sipas Institutit të Gjeoshkencave do të nisin me intensitet të lartë në Shkodër, e cila është edhe më e rrezikuara nga vërshimet e shpejta të lumenjve të vegjël malorë, për t’u spostuar më pas drejt jugut.
ALBAN DOKO
HIDROLOG, IGJEO
“Mund të ketë përmbytje urbane duke filluar nga Qarku i Shkodrës, pasi edhe masat atmosferike me intensitet të lartë do të fillojnë nga veriu në drejtim të jugut. Do të fillojnë nga Qarku i Shkodrës, Kukës, Dibër, Lezhë, Durrës, Tiranë, Vlorë, Gjirokastër, me intensitet më të shtuar, ndërsa pjesa e Fierit, Elbasanit dhe Beratit kanë një intensitet më të ulët. Në të gjitha zonat urbane mund të priten edhe përmbytje, të lokalizuara.”
Në lumenjtë Drin, Buna, Shkumbin dhe në Liqenin e Shkodrës pritet rritje e prurjeve, por jo dalje e tyre nga shtrati. Banorët këshillohen që në kulmin e reshjeve të shmangin lëvizjet, ndërkohë që grupet e emergjencave civile do të jenë në terren.
ALBAN DOKO
HIDROLOG, IGJEO
“Banorët që e dinë shumë mirë rrezikun e përmbytjeve, të kufozopjnë lëvizjet e shpeshta, plus objektet në katet e para, në zonat që dihet që kanë përmbytje, të spostohen. Por jo se pritet ndonjë rrezik të madh sepse në zonat urbane dihet që përmbyten vetëm rrugët.”
Mesditën e të martës pritet një përmirësim i kushteve të motit. Reshjet, sipas parashikimeve të Institutit të Gjeoshkencave, do të na shoqërojnë përgjatë gjithë javës, por në sasi më të pakta.
