Kryetari i Këshillit të Agrobiznesit Shqiptar, Agim Rrapaj deklaroi se fermerët duhet të marrin drejtpërdrejt naftën pa taksa. Duke folur në emisionin “E-Zonë”, në “Vizion Plus”, Rrapaj tha se në këtë mënyrë do të shmangen abuzimet dhe kjo nismë do të rezultojë e suksesshme. Gjithashtu, ai kërkoi një kuadër ligjor që ndëshkon abuzuesit.
“Fermeri duhet të marrë karburantin drejtpërdrejt, jo përmes një hallke të tretë që mund të abuzojë, nëse ka një kuadër ligjor ku ai që abuzon të mbajë përgjejgësi dhe nëse ka një mbështetje të fuiqshme dhe koordinim mes sektorit privat dhe institucioneve publike, këto tre parime bëjnë që ne të mos kemi frikë nga dështimi i radhës. Në radhë të parë të fillojmë me karburantin e vendit.”
Agim Rrapaj tregoi edhe skemën që ka propozuar KASH në ministri për mënyrën sesi duhet të realizohet puna. Për të, është më mirë që fermerët të bashkëpunojnë me një institucion publik dhe shoqërinë civile.
“KASH ka bërë propozim konkret. Kemi propozuar që të realizohen disa parime, naftën ta marrë drejtpërdrejt përfituesi, ai që kryen shërbimin në hallkat e zinxhirit, të furnizohen me naftë me çmim të reduktuar, të gjithë hallkat e zinxhirit që kanë dhe përdorin përpunimin e lëndëve të para të prodhuara nga bujqësisa dshe blegtoria. Kemi kërkuar një kuadër ligjor transparent që të jetë një proces afatgjatë dhe të mos riskohet nga dështimi i radhës. Duhet të analizojmë çfarë nuk shkoi me skemën e parë. Tri janë variantet: Vetë shteti me strukturat e veta; mund ta japë me koncesion; një kompani publike me shoqërinë civile dhe vetë fermerët, mund ta realizojnë. Ne kemi zgjeduhr këtë të tretën.”
Agim Rrapaj tha se është ngritur një grup pune që po punon në garantimin e kësaj lehtësie për fermerët. Megjithatë, ai tha se nuk di sesa fermerë do të jenë përfitues.
