Sot pasdite lideri i opozitës Sali Berisha do të mbledhë kryetarët e degëve e më pas kryesinë për organizimin e Kuvendit Kombëtar, që do të mbahet të shtunën.
Çështja më e rëndësishme e Kuvendit të 2 dhjetorit është votëbesimi i Sali Berishës. Sipas statutit, pas humbjes së zgjedhjeve lokale të 14 majit, delegatët e Kuvendit duhet të votojnë nëse janë pro apo kundër që Sali Berisha të jetë kryetari i tyre.
Por votëbesimi është më së shumti formal, pasi prej humbjes së zgjedhjeve lokale asnjë prej demokratëve nuk ka folur publikisht për largimin e Sali Berishës.
Nga ana tjetër në Kuvend do të diskutohet edhe aksioni i opozitës dhe si do të vazhdojë ai përballë qeverisë së drejtuar nga kryeministri Edi Rama.
Ende është e paqartë nëse Gazment Bardhi dhe deputetët që e mbështesin do të jenë pjesë e këtij Kuvendi.
Deri më tani ky grup demokratësh ka zhvilluar mbledhje me Sali Berishën dhe deputetët që e mbështesin, por ata ende nuk e kanë njohur Berishën si kryetar të Partisë Demokratike.
