Kjo fundjave risolli acarin dhe dëborën në gjithë vendin. Era e fortë ka krijuar ngrica, sidomos në veri dhe juglindje, aty ku ka pasur dhe më shumë reshje.
Por zona më e goditur nga rërëtat e fuqishme ,ishte qarku i Lezhës. Dy makina të mëdha u përmbysën në rrugën kombëtare duke krijuar edhe bllokim të trafikut.
Fatmirësisht nga këto incidente nuk ka patur të lënduar rëndë.
Por era e fuqishme ka shkulur pemët si dhe ka dëmtuar linjat elektrike duke lënë pa energji mijëra banorë.
Ndërsa në qytetin e Lezhës u dëmtua çatia e një shtëpie e cila rrezikoi dhe jetën e 8 anëtarëve te familjes.
Ndërkohë ne Portin e Shëngjinit për shkak te erës se forte është penguar dalja e anijeve ne det. Më e qetë duket situata në Portin e Durrësit, ndonëse autoritetet paralajmëruan vonesa të trageteve. Megjithatë Durrësi është zgjuar mëngjesin e kësaj të shtune, i zbardhur nga dëbora.
Situata me e vështirë është në juglindje. Qarku i Korçës po përballet sërish me reshjet e dëborës dhe me temperatura që kanë arritur deri në–10 grade. Mjetet borëpastruese kane filluar me pastrimin e rrugëve.
Policia u ka kërkuar shoferëve të përdorin zinxhirët në një pjesë të rrugës Korçë Dardhë, në Qafën e Qarrit si dhe në aksin Korçë – Voskopojë.
Për shkak të reshjeve të borës ka pasur edhe probleme me furnizimin me energji elektrike në disa fshatra ne Korçës.
Autoriteti Rrugor Shqiptar i bën thirrje qytetareve qe te kenë kujdes dhe te respektojnë sinjalistikën rrugore.
