Rikthehet “hakmarrja për drejtësi”

“Hakmarrja për drejtësi” pas dy dekadave mbetet ende një proces gjyqësor pa vendim përfundimtar. Pas ankimimit në Gjykatën Kushtetuese të Orik Shytit, një prej të dënuarve me burg përjetë, por që ende ndodhet në arrati, u rihap sërish dosja këtë të mërkurë në Gjykatën e Lartë. Kjo instance qe duhet të shqyrtojë çështjen pas vendimit të kushtetueses, nuk arrin dot të formojë kolegjin penal prej 5 anëtarësh. Shorti i hedhur zgjodhi edhe një anëtar, i cili e ka gjykuar çështjen vite më parë, e për këtë arsye nuk mund të marrë pjesë në proces. Vëllezërit Orik dhe Laert Shyti, të dënuar përjetë, kërkojnë nga drejtësia rihapjen e çështjes, pasi ata pretendojnë për një proces politik në shkelje të të drejtave të njeriut, për të cilin tashmë kanë fituar dhe azil politik. Të dënuarit e “hakmarrjes për drejtësi” akuzohen për vrasjen e Genci Sines, shoferit të ish-kryeprokurorit Theodhori Sollakut, ngjarje kjo e ndodhur në vitin 2003.