Pas 11 vitesh, rikthehet gjuetia në Shqipëri. Ligji që lejon gjuetarët të ushtrojnë aktivitetin e tyre në zona të caktuara tashmë është dekretuar dhe botuar në Fletoren Zyrtare.
Me ligjin e ri, gjuetar nuk mund të jetë dikush më i vogël se 25 vjeç dhe po ashtu, veç kriterit të moshës duhet të ketë edhe armë gjahu me leje dhe të jetë licencuar për aktivitetin.
“Nuk mund të kryhet nga çdo njeri. Ata që do të ushtrojnë veptimtarinë, duhet të jenë të pajisur me leje për armëmbajtje dhe me licencën. Kjo do të bëhet në bashkëpunim me Federatën e Gjuetarëve që do të vlerësojnë subjektet që mund të ushtrojnë aktivitetin. Do të përcaktohet lista e specieve të faunës që do të jenë objekt gjuetie dhe kjo do të bëhet pas një vlerësimi nga ana e ekspertëve. Disa mund të kalojnë nga lista e specieve të mbrojtura, në një listë që lejohet gjuetia dhe e kundërta, nëse dikur është lejuar gjuetia por shohim që ka pakësim të tyre, do të futen në një listë për t’u ndaluar gjuetia”, tha Klodiana Marika, Drejtore e Biodiversitetit dhe Zonave të Mbrojtura, Ministria e Mjedisit.
Sipas ligjit të ri, bashkitë kanë për detyrë të caktojnë zonat ku do të lejohet gjuetia. Këto zona më pas do të merren në menaxhim nga një subjekt privat.
“Një risi është përcaktimi i zonave të gjuetisë dhe i zonave të mbarështimit. Zonat e gjuetisë i caktojnë njësive të qeverisjes vendore që kanë për detyrë të bëjnë një vlerësim të situatës dhe të rishikojnë zonat e gjuetisë që ato më pas të propozohen në Ministrinë e Mjedisit që të miratohen me VKM. Kemi futur konceptin e menaxhuesit të zonave të gjuetisë, që është një subjekt fizik ose juridik privat, nuk përjashtohen as shoqatat e gjuetarëve, që do të marrin në përdorim një zonë gjuetie në përdorim me një afat prej 10 vjetësh. Është detyrë e njësive të qeverisjes vendore që të përgatiasin planin e menaxhimit për këtë zonë dhe menaxheri të përgatisë planin e biznesit dhe kuotat”, u shpreh Marika.
Megjithatë, edhe pse ligji për rikthimin e gjuetisë është miratuar, aktiviteti nuk mund të ushtrohet ende. Së pari, kjo është një periudhë kur nuk lejohet gjuetia për të respektuar ciklet biologjike të kafshëve, si letargjia apo riprodhimi.
Po ashtu, bashkitë e kanë këtë vit në dispozicion për të përcaktuar zonat e gjuetisë dhe ato të mbarështimit.
/vizionplus.tv
