Që nga fillimi i aksionit “forca e ligjit” dhe deri tani janë arrestuar mbi 100 persona të përfshirë në krimin e organizuar. Taskë forca e posacme ka vënë sekuestron mbi miliona euro pasuri të përfituara kryesisht nga trafiku ndërkombëtar i drogës.
Më tepër se 13 milionë euro pasuri, llogari bankare, asete dhe prona që i përkasin krimit të organizuar janë sekuestruar nga njësia e Task- forces së Policisë. Të dhënat i përkasin periudhës nëntor 2017- shtator 2018.
Ndër operacionet më te rëndësishme përmendet sekuestrimi i hoteli “Santa Quaranta”, në pronësi të Kelmend Balilit në Sarandë. Vlera në total e aseteve të tij, sipas policisë arrin në rreth 6.7 milionë €.
Po ashtu pasuri tjera me vlerë rreth 5 milionë euro u sekuestruan së fundmi nga policia pas vendimit të datës 3 shtator të Gjykatës së Krimeve të Rënda në Tiranë.
Pasuritë i përkasin Arjan Ndocit, Julian Deblinit e të afërmve të tyre. Këta të fundit janë arrestuar në prill të këtij viti pas një operacioni të autoriteteve spanjolle, në bashkëpunim me DEA-n amerikane dhe europolin. Në grupin e pasurive të tjera të sekuestruara nga organet e zbatimit të ligjit llogariten dhjetra apartamente, 43 mijë metra katrorë sipërfaqe toke.
Më tepër se 15 grupe të njohura të botës së krimit janë goditur sipas ministrisë së brendshme në këtë periudhë. 104 persona janë arrestuar ndërsa në total numri i personave të marrë në ndjekje penale është 126 në total.
Sekuestro eshte vendosur edhe për kompani e subjekte të ndryshme tregtare.Ato iu përkasin individeve ose grupeve kriminale, të cilët janë vendosur nën akuzë nga organet e hetimit, për përfshirje të tyre në aktivitete të krimit të organizuar.
