Asambleja e Përgjithshme e Kombeve të Bashkuara do të votojë sot rezolutën për gjenocidin serb në Srebrenicë.
Dokumenti i propozuar nga Gjermania dhe Ruanda kërkon që 11 korriku të shpallet dita ndërkombëtare e përkujtimit të mijëra viktimave civile, e po ashtu dënon mohimin e gjenocidit dhe nderimin e kriminelëve të luftës.
Dhjetëra vende të tjera kanë shprehur mbështetjen për këtë rezolutë, përfshirë të gjitha vendet e rajonit, përveç Serbisë dhe entitetit serb të Bosnje e Hercegovinës, Republika Sërpska.
Zyrtarët serbë, pavarësisht vendimeve të gjykatave ndërkombëtare, mohojnë se në Srebrenicë është kryer gjenocid kundër boshnjakëve. Ata pretendojnë se rezoluta do t’i cilësonte të gjithë serbët si fajtorë, ndonëse në draft nuk përmendet një gjë e tillë.
Presidenti serb Aleksandër Vuçiç po lobon në mënyrë aktive kundër miratimit të kësaj rezolute ndërsa, lideri i Republikës Srbska vetëm një ditë më parë kërcënoi se qeveria e tij do të propozojë ndarjen e vendit.
Dodik ka bërë kërcënime të tilla edhe në të kaluarën, që territoret e kontrolluara nga serbët të shkëputen nga Bosnja dhe të bashkohen me Serbinë fqinje.
Gjenocidi në Srebrenicë ndodhi në vitin 1995 kur forcat serbe vranë më shumë se 8 mijë djem e burra boshnjakë myslimanë në atë që është konsideruar si mizoria më e madhe në Europë që prej luftës së dytë botërore./vizionplus.tv
