Pedagogu dhe analisti, Rezart Prifti bëri thirrje që qytetarët të mos votojnë në zgjedhjet vendore të 14 majit.
Sipas tij, kjo do të bëntë që vendi të prekte fundit, duke shtuar se shoqërisë shqiptare i ka ardhur thika deri në palcë.
Në studion e Quo Vadis në Vizion Plus, Prifti shtoi se sistemi aktual nuk garanton as rregulla dhe as transparencë për shoqërinë.
“Unë kam një teori që konsideroj pikën që do bëhet më keq kur njerëzit të mos dalin të votojnë. Unë kam dalë me një teori timen që iu bëj thirrje njerëzve të mos votojnë. Kam dëgjuar këtë se teorinë demokraci është pjesëmarrje dhe edhe kjo që them unë është pjesëmarrje që tregon një akt historik të shoqërisë shqiptare që pasi i erdhi thika deri në palcë, reaguan e thanë mjaftë më me këtë punë. Në këto momente që jemi duke qenë se as sistemi nuk garanton më as rregulla, as transparencë, të paktën në favor të shoqërisë, jemi në pikën që kemi një zhbërje të të gjithë sistemeve. Për mua ne po lajmë hesapet e makrabitetit kulturor e edukimit që i bëmë kësaj shoqërie”, thekson ai.
Në të njëjtën kohë, Prifti shprehet se partitë politike fushatën elektorale e kanë shndërruar në teatër, ku në fokus kanë akuzat dhe sharjet ndaj kundërshtarëve. Ai shton se në këtë formë qytetarët nuk prezantohen me programe elektorale duke mos pasur të qartë alternativat që iu ofrohen.
