Vazhdon hedhja e kripës në rrugën Boge–Theth për të shmangur ngricat, ndërsa për nesër parashikohen reshje bore me intensitet të lartë. Autoritetet bëjnë thirrje drejtuesve të automjeteve që të pajisen patjetër me zinxhire, pasi qarkullimi i mjeteve do të jetë i mundur vetëm me zinxhire.
Ndërkohë reshjet e borës vazhdojnë edhe në qarkun Dibër, duke krijuar vështirësi në rrugët rurale dhe malore, sidomos në njësitë administrative Lurë, Kala e Dodës, Selishtë, Muhurr, Trebisht, Ostren dhe zona të thella si Fushë-Bulqizë, Maqellarë dhe Xibër. Rrugët janë të mbuluara me borë dhe akull, ndaj autoritetet kërkojnë kujdes të shtuar dhe përdorim të gomave dimërore.
Në qarkun Korçë dhe zonat përreth, reshjet e dendura të dëborës kanë shkaktuar ndërprerje të energjisë elektrike për rreth 1 143 abonentë ruralë, për shkak të defekteve teknike dhe amortizimit të rrjetit. Zonat më të prekura janë Gur i Kuq, Lozhan, Maliq, Leskovik, Ersekë dhe Vithkuq.
Autoritetet po punojnë për rikthimin e furnizimit dhe u bëjnë thirrje banorëve të jenë të kujdesshëm dhe të shmangin kalimin në rrugët problematike.
/vizionplus.tv
