Mbrëmjen e kaluar lartësitë 1000 metra mbi nivelin e detit u përfshinë nga reshjet e borës, por pa krijuar probleme në qarkullimin e automjeteve. Trashësia e borës në zonat e thella arriti deri në 15 centimetra, por megjithatë nuk u bë shkak për bllokimin e qarkullimit të banorëve drejt zonave urbane.
Vështirësi pati Byppasi i rrugës së Arbrit në Qafën e Murrizit. Për disa orë drejtuesit e mjeteve qarkulluan me vështirësi për shkak të prezencës së borës ndërsa u desh edhe ndërhyrja e borëpastrueseve.
Ndërkohë mesditën e sotme në këtë segment rrugor probleme pati me rënien e gurëve si pasojë e erozionit.
Në disa pjesë ka rënie të vazhdueshme gurësh, ndërsa këshillohet që drejtuesit e mjeteve të tregohen të kujdesshëm teksa lëvizin në drejtim të Tiranës apo Qarkut Dibër.
