Rëndohet bilanci i të infektuarve dhe i viktimave nga koronavirusi në Shqipëri. Në 24 orët e fundit, kanë humbur jetën gjashtë qytetarë të tjerë, duke e çuar totalin e vdekjeve në 219.
“Fatkeqësisht, nuk e kanë fituar dot betejën me sëmundjen në dy spitalet Covid, pavarësisht përpjekjeve të mjekëve, një 62 vjeçar nga Tepelena, një 63 vjeçar nga Lezha, një 70 vjeçar nga Mati dhe 3 qytetarë nga Tirana; një 73 vjeçare, një 81 vjeçar dhe një 82 vjeçar.”
I lartë është edhe numri i personave të infektuar, që u raportuan këtë të premte nga Ministria e Shëndetësisë.
Sipas Mirela Camit, midis 639 të testuarve, u konfirmuan pozitivë 146 vetë.
Ky është një numër më i ulët krahasuar me një ditë më parë, kur u regjistruan 154 raste.
“Shpërndarja gjeografike e rasteve pozitive ditore është si vijon: 76 raste në Tiranë, 23 në Krujë, 11 në Fier, 7 në Durrës, 6 në Kukës, 5 në Elbasan, 4 në Shkodër, nga 2 raste në Kurbin, Lezhë, Kamëz, Malësi e Madhe, nga 1 rast Has, Kavajë, Lushnje, Pukë, Tepelenë, Bulqizë.”
Gjithsej, në vendin tonë janë infektuar 7.117 persona që nga marsi.
