Rëndohet bilanci i tërmetit në Iran dhe Irak
E marta është shpallur zi kombëtare në Iran pas tërmetit shkatërrues me magnitudë 7.3 ballë që mori jetën e më shumë se 430 personave. Mijëra iranianë kaluan natën e dytë në qiell të hapur dhe në temperatura thuajse zero.
Qeveria po përpiqet që të dërgojë ndihmë në zonat e goditura më rëndë në provincën malore Kermanshah, ku qindra shtëpi janë shkatërruar dhe ndërkohe vijojnë kërkimet per nxjerrjen e trupave nga rrënojat.
Rreth 7000 persona u plagosën dhe rreth 70 000 njerëz kanë nevojë për ndihmë dhe strehë. Mediat lokale bëjnë me dije se banesat e shumë prej atyre që fjetën jashtë, ishin të paprekura nga tërmeti, por njerëzit kishin frikë të ktheheshin brenda per shkak te vazhdimit te lëkundjeve.
Në zonën e goditur nga tërmeti në kufirin midis Iranit dhe Irakut, në pjesën më të madhe mungon uji dhe energjia elektrike, ndërsa raportohet se rrugët e bllokuara po pengojnë ndjeshëm përpjekjet për të ndihmuar njerëzit.
