Rektorati i universitetit “Fan Noli” në Korçë ka bërë me dije se do të rishqyrtojë vendimin për t’u bashkuar me Universitetin e Tiranës.
Ky rishqyrtim i vendimit vjen pas zërave kundër, ndër të cilat edhe Këshilli Studentor i këtij universiteti. Këshilli Studentor e konsideroi këtë propozim si skandaloz.
Për këto arsye, rektorati i universitetit “Fan Noli” thekson në një njoftim të dytë se do të rishikojë propozimin në mbledhjet e radhës për të dalë më pas në një qëndrim përfundimtar.
“Ashtu siç jeni vënë në dijeni këto 24 orët e fundit nga diskutimet që janë bërë publike në media dhe në rrjete sociale, Senati Akedemik i UNIKO ndërmori një nismë për hartuar një strategji për kapërcimin e sfidave që e presin, nëpërmjet fillimit të procedurave dhe koordinimin e kritereve të bashkimit me Universitetin e Tiranës.
Pas një diskutimi më të gjerë në nivel njësie qendrore dhe njësie baze, kjo nismë do të rishqyrtohet në mbledhjet e ardhshme të organeve vendimmarrëse të Universitetit, te cilat do të dalin me një vendim përfundimar”, thuhet në njoftim.
Prej disa vitesh aplikimet për lëndët prioritare dhe jo vetëm kanë shfaqur një tendencë të theksuar rënieje në universitetit “Fan Noli”. Ky ishte dhe shkaku që përfaqësues të këtij institucioni arsimor propozuan bashkimin e Universitetin e Tiranës.
