Shifra më e lartë e të infektuarve deri më sot në Shqipëri u regjistrua këtë të hënë. Sipas Ministrisë së Shëndetësisë, në 24 orët e fundit janë regjistruar 295 raste të reja dhe janë kryer 1.413 testime.
Numri i pacientëve që kanë humbur jetën është i njëjtë me dje, tre. Qytetarët që nuk e mposhtën dot virusin janë një 47-vjeçar nga Tirana dhe një 53-vjeçare e një 64-vjeçar nga Durrësi. Të tre ata me sëmundje të tjera.
Në orët e fundit janë shëruar 96 qytetarë, duke e çuar totalin në 10.167. Në dy spitalet COVID po trajtohen 259 pacientë, 22 në terapi intensive dhe katër të intubuar.
Në total, në Shqipëri kanë humbur jetën 454 persona dhe janë konfirmuar pozitivë 17.350 qytetarë.
