Reformat e reja kushtetuese të propozuara nga kryeministri Mateo Renzi do të reduktonin rolin e senatit, çka do t’i jepte fund krizave dhe mungesës se stabilitetit të politikës italiane. Kështu komentohen ne media ndryshimet e propozuara nga qeveria, e cila ka caktuar 4 dhjetorin si ditën kur do të mbahet referendumi për reformën kushtetuese, më e rëndësishmja pas luftës së dytë botërore. Propozimet në fjalë janë miratuar nga të dyja dhomat e parlamentit dhe parashikojnë që jo të gjitha ligjet të miratohen ne kuvend e senat. Ky i fundit do të shprehet për ligje të caktuara. Këto masa janë kërkuar nga qeveria Renzi për të shmangur zvarritjen që senati mund t’i bëje reformave të qeverisë së tij të cilat prodhojnë kriza të njëpasnjëshme. Që prej vitit 1945 Italia ka ndërruar gjithsej 63 qeveri. Gjashtë vitet e fundit, per shkak edhe të krizës ekonomike dhe numrit të lartë të papunësisë, në Itali janë ndërruar katër kryeministra.
