Bashkia e Selenicës ka kundërshtuar vendimin e Reformës së re Territoriale që parashikon shkrirjen e saj dhe bashkimin me Bashkinë e Vlorës.
Banorë, përfaqësues të komunitetit, intelektualë dhe drejtues vendorë janë mbledhur në qendër të Selenicës, ku po zhvillohet Kuvendi i Selenicës, për të diskutuar qëndrimin e zonës dhe hapat që do të ndërmerren në vijim.
Gjatë takimit, pjesëmarrësit kanë shprehur kundërshtimin e tyre ndaj projektit të reformës, duke argumentuar se bashkimi me Vlorën do ta vështirësojë marrjen e shërbimeve publike për banorët e fshatrave dhe do të ndikojë negativisht në zhvillimin e zonës.
Sipas tyre, humbja e statusit të bashkisë do ta lërë Selenicën në harresë, duke sjellë më pak investime dhe më pak vëmendje ndaj nevojave të komunitetit. Banorët kërkojnë që qeveria të tërhiqet nga plani për shkrirjen e Bashkisë së Selenicës dhe të ruajë funksionimin e saj si njësi e veçantë e pushtetit vendor.
Një nga organizatorët e këtij kuvendi, Lili Bombaj, shpjegoi se takimi është organizuar për të dëgjuar zërin e qytetarëve dhe për të mbrojtur interesat e Selenicës. Ai renditi argumentet kryesore kundër Reformës Territoriale, duke theksuar se bashkia plotëson kriteret për të vijuar funksionimin si njësi më vete.
Kuvendi pritet të përcaktojë edhe hapat e mëtejshëm që do të ndërmarrë komuniteti për të kundërshtuar reformën dhe për të mbrojtur statusin e Bashkisë së Selenicës.
/vizionplus.tv
