Real Madrid nuk njeh më rivale, qoftë kjo edhe Barcelona e Lionel Messit. Madrilenet fituan 3 me 1 takimin e parë në Kamp Nou të vlefshëm për Superkupën e Spanjës, duke hipotekuar një tjetër trofe në këtë 2017 të paarritshëm deri tani ku janë koleksionuar La Liga, Uefa Champions League dhe Superkupa e Europës.
Ndeshja me shumë episode ne Barcelone ku në pjesën e parë të zotët e shtëpisë me qarkullimin e zakonshëm te topit falë Iniestes, Messit dhe Suares ishin më lartë sesa Reali, por pa qenë dot konkret. Më pas, në pjesën e dytë ndodh gjithçka. Kalojnë vetëm 5 minuta lojë dhe pas një aksioni pa pretendime nga e majta dhe një top i hedhur në zonë nga Marselo, Pike shënon autogol dhe i jep avantazhin miqve.
Ndeshja ndizet me vendasit që reagojnë, por Deulofeu i aktivizuar si zëvendësuesi i Neymar, humbet një shans të artë ashtu sikurse në krahun tjetër Carvahal hedh tej mundësinë për dyfishin, sikurse i ndodh edhe Marselos në minutën e 72. Pak minuta më vonë, Suarez vjedh një 11-metersh që sjell shumë polemika, por nga pikla e bardhe Messi barazon dhe i shënon pas 5 vitesh në këtë stadium kundërshtarit më të urryer.
Reali nuk pajtohet me barazimin dhe pas 3 minutash del ne skene Ronaldo, i cili pas një kundërsulmi vrasës shënon një supergol dhe feston duke hequr bluzën dhe duke ia treguar publikut në Kamp Nou, siç bënte Messi një vit më parë. Buskets nga ana tjetër humbet një shans të pabesueshëm për të barazuar shifrat, ndërsa Ronaldo del jashtë me te kuq, pasi merr kartonin dytë të verdhe për simulim.
Miqtë luajnë në fund me 10 lojtarë, por kjo nuk e pengon Asension të shënojë një tjetër gol të shkëlqyer që e mbyll ndeshjen ne 3 me 1. Ndeshja e kthimit pas 3 ditësh i jep qetësinë e duhur madrileneve për të fituar një tjetër trofe.
