Real Madrid bëri një hap fals në sfidën hapëse të sezonit . Skuadra e Zidan nuk shkoi më shumë se një barazim pa gola në transfertë përballë Real Sociedad. Pjesa e parë nisi mirë për Realin që rrezikoi me Ramosin por gjithcka u ndal në momentin e fundit. Edhe pse madrilenët rrezikuan gjatë gjithë 90-minutëshit për të zhbllokuar rezultatin, veçanërisht me Benzema, të besuarit e trajnerit Zidan nuk patën shënjestrën e duhur para portës kundërshtare.
Ndërkohë nga ana tjetër vendasit provuan portën por gardiani Courtua reagoi mjaft mirë. Los Blancos vinin në këtë ndeshje me mungesa të mëdha si pasojë e dëmtimeve. Asensio, Hazard dhe Isko nuk ishin në dispozicion të teknikut francez. Merite pati edhe Sociedad që zhvilloi një paraqitje mjaftë të mirë dhe dha një sinjal të qartë për të gjitha klubet e mëdha të cilat shpesh ngecin në San Sebastian.
Real Madrid nuk mori më shumë se një pikë në këtë sfidë duke e nisur keq rrugëtimin për mbrojtjen e titullit kampion.
